MAMA AJIFUNGUA MTOTO MWENYE VICHWA VIWILI KIGOMA

MAMA mmoja ajulikanae kwa jina la Safi Ramadhani (25) mkazi wa kijiji cha Nkokwa Tarafa ya Buhingu katika Wilaya ya Uvinza mkoani Kigoma, amejifungua mtoto mwenye vichwa viwili katika Hospitali ya mkoa  Maweni.

Akizungumza na KAY STALLION Hospitalini hapo hii leo, Kaimu Mganga Mkuu wa mkoa wa Kigoma, Dk. Shija Ganai alisema kuwa, mama huyo alifikishwa Hospitalini hapo jana majira ya saa 11 jioni huku akiwa ni mjamzito baada ya kupewa rufaa kutoka katika kituo cha afya cha Buhingu.

Picha hii haihusiani na tukio samahani kwa usumbufu mana picha za tukio hazikupatikana

Alisema kuwa, awali mama huyo alifikishwa kweye kituo cha afya Buhingu usiku wa juzi, baada ya kufanya juhudi za kumzalisha mtoto alitoka lakini alitanguliza matako huku kichwa kikishindikana kutoka hivyo wakaamua kumsafirisha hadi hospitali ya mkoa.

“Baada ya kumpokea hapa, wauguzi na madaktali walimpeleka kwenye chumba cha upasuaji na juhudi za kumtoa mtoto yule zilifanyika lakini ilishindikana huku sababu ya mtoto kushindwa kutoka ikiwa haijajulikana hivyo ikawabidi kumfanjia upasuaji.

“Kabla ya kumfanyia upasuaji ilibidi kutenganisha kwanza kichwa na kiwiliwili na baada ya upasuaji walikuta vichwa viwili ambavyo vilikuwa na viungo vyake vyote  kama kawaida baada ya kutenganishwa kwenye shingo” alifafanua Ganai.

Aidha Dk. Ganai alisema kuwa, mtoto yule alikuwa ameshafariki mara baada ya harakati za kumtoa mtoto tumboni kuanzia kituo cha afya cha Buhingu hadi Hospitalini hapo, ila mama wa mtoto yeye ni mzima japokuwa anauguza majeraha ya zile purukushani za kumtoa mtoto.

Kwa upande wake Salum Shaban ambaye ni Mume wa Mama huyo alisema kuwa, mke wake alipata ujauzito kama kawaida na alikuwa na afya njema muda wote wa ujauzito ila baada ya kupata uchungu na kufikishwa kituo cha afya cha Buhingu ndipo mtoto aliposhindwa kutoka na kuwalazimu kupewa rufaa kwenda hospitali ya Maweni.

“Kilichoshangaza ni baada ya kufanyiwa upasuaji na mtoto kugundulika ana vichwa viwili, kitu ambacho hakijawahi kutokea katika uzazi wa mke wangu mana kabla ya ujauzito huu alishajifungua mara mbili na watoto wote ni wazima hawana matatizo yoyote” alisema Shabani.